Адно з вядучых прыватных прадпрыемстваў Прыбужжа па дрэваапрацоўцы – ТАА «ВолатТрейд» заснавана ў 2008 годзе. Кампанія аснашчана высокатэхналагічным абсталяваннем і спецыялізуецца на вырабе якаснай двухслаёвай паркетнай дошкі, дэкаратыўных сценавых панэляў і драўляных сталоў, даказваючы сваім кліентам, што вытворчасць падобнага роду прадукцыі ў Беларусі можа адпавядаць міжнародным стандартам якасці і быць заўсёды ў трэндах будаўнічай моды.
  Пачыналася ж усё ў 2008 годзе, калі для працы ў сферы дыстрыбуцыі прафесійных лакафарбавых матэрыялаў для аздаблення драўніны і клеяў для дрэваапрацоўчай прамысловасці было адкрыта прадпрыемства ТАА «ВолатТрейд».
  «Пачынала наша кампанія, сапраўды, з распаўсюджвання лакафарбавых матэрыялаў і клеяў для дрэваапрацоўчай прамысловасці. Працавалі з прадпрыемствамі Брэсцкага рэгіёну, было наладжана выдатнае супрацоўніцтва са шведскай кампаніяй «Becker-Acroma». Але мы разумелі, што трэба расці і ісці наперад», – успамінае намеснік дырэктара кампаніі Вадзім Федорако.
  У 2012 годзе прадпрыемства пачало рэалізацыю інвестыцыйнага праекта па стварэнню вытворчасці паркетнай дошкі на тэрыторыі раёна. Дзяржава падтрымала цікавую ідэю, з выбарам пляцоўкі і далейшай рэалізацыяй дапамаглі мясцовыя ўлады. З прапанаваных зямельных участкаў была абрана пустка ў ваколіцах вёскі Чарнаўчыцы.
  «Мы разглядалі шмат розных месцаў для адкрыцця вытворчасці. Самае важнае, на што абапіраліся пры выбары, – гэта размяшчэнне, наяўнасць дарог, каб можна было хутка і без праблем дабірацца, дастаўляць сыравіну і вывозіць гатовую прадукцыю. Звярталі ўвагу на наяўнасць рабочых кадраў. Глядзелі, каб вёскі не былі маленькімі і ў іх былі людзі, гатовыя працаваць. Ну і блізкасць да іграла важную ролю пры выбары месца. Вёска Чарнаўчыцы ў гэтым плане нас цалкам задаволіла: добрае размяшчэнне, блізкасць да горада, побач аўтамабільныя дарогі, ды і з рабочай сілай было ўсё добра. 70% усіх, хто тут сёння працуе, – гэта мясцовыя жыхары», – распавёў Вадзім Уладзіміравіч.
  Будавалася прадпрыемства досыць хутка. У лістападзе 2013 года праект быў рэалізаваны: пабудаваны першыя аб'екты, ўстаноўлена самае сучаснае абсталяванне вядучых еўрапейскіх вытворцаў і набыта тэхніка. А ўжо ў студзені 2014 года была адгружана першая партыя прадукцыі.
  «Увесь 2014 год быў для нас перыядам станаўлення. Мы шукалі сябе, свой асартымент і свайго пакупніка. Плённая праца пачалася толькі з канца 2014-га і працягваецца па гэты дзень», – падзяліўся намеснік дырэктара прадпрыемства.
У 2015 годзе тут была распрацавана першая лінейка паркетнай дошкі, пакрытай ў завадскіх умовах масла-воскам. Гэта адкрыла шлях да засваення новага рынку і пашырыла асартымент вырабаў.
  Асноўны від прадукцыі, якую цяпер выпускае ТАА «ВолатТрейд», – паркетная дошка. Яна складаецца з двух пластоў – бярозавай фанеры падвышанай вільгацятрываласці і пілаванай ламелі з дуба, злучаных пад ціскам клеем.. Атрымліваецца шматслаёвая стабільная дошка, якая злучаецца з іншымі дошкамі з дапамогай сістэмы шып-паза. Дадзеная канструкцыя прызначана для кладкі ў памяшканнях любога тыпу і прыдатная для ўстройвання цёплых падлог.
  «Выраб паркета – гэта ніша цікавая. Мэблі, дзвярэй, розных сталярных вырабаў і вокнаў зараз шмат, а тых, хто вырабляе паркет, можна па пальцах пералічыць. Канкурэнцыя накшталт невялікая, але на самой справе, ніша сама па сабе даволі вузкая. Укараненне новых тэхналогій, метадаў апрацоўкі і вырабу пашырае асартымент нашай прадукцыі і спрыяе прыцягненню новых пакупнікоў і рынкаў збыту», – падкрэсліў Вадзім Федорако.
   Акрамя вырабу высакаякаснага паркета, ТАА «ВолатТрейд» з'яўляецца адзіным вытворцам у Рэспубліцы Беларусь, які робіць унікальныя сценавыя панэлі з 3D эфектам. Дадзеныя панэлі складаюцца з дубовых планак рознай таўшчыні, якія складзеныя ў блокі памерам 200 на 400 мм. Іх мантаж вельмі просты. Пры наяўнасці пэўнага інструмента і досведу працы з дрэвам сабраць сцяну, абкласьці калону або зрабіць дэкаратыўную бэльку, са слоў нашага суразмоўцы, зможа любы чалавек. Галоўная перавага сценавых панэляў, якія выпускаюцца прадпрыемствам, – экалагічнасць, непаўторны знешні выгляд, даўгавечнасць, прастата ў сыходзе.
  Ўсю сваю прадукцыю Чарнаўчыцкая кампанія прадстаўляе пад уласным брэндам – TARWOOD. Дадзены гандлёвы знак шырока вядомы за межамі нашай рэспублікі. Дзевяноста працэнтаў усёй вырабленай прадукцыі ідзе ў Расію, Галандыю, Турцыю, Германію, краіны Балтыі і Казахстан, а тыя, што засталіся дзесяць – распаўсюджваюцца на мясцовым рынку.
  «Беларускі рынак, калі параўноўваць яго з рынкам Расіі, у сотні разоў менш. Але гэта не гаворыць, што беларусы не хочуць ці не могуць купіць паркет. На пастаўкі па краінах ўплываюць агульная колькасць жыхароў, магчымасці і жаданне выкарыстоўваць у якасці падлогавага пакрыцця паркетную дошку. Ад гэтага складаецца цяперашняя карціна супрацоўніцтва са знешнім і ўнутраным рынкам», – заўважае намеснік дырэктара кампаніі Вадзім Федорако.